Адбылася сустрэча Кандрусевіча і Лукашэнкі

Аляксандр Лукашэнка сёння з нагоды другога дня святкавання Вялікадня па каталіцкім календары наведаў менскі Архікафедральны касцёл імя Найсвяцейшай Панны Марыі.

Беларускі кіраўнік сустрэўся з архібіскупам мітрапалітам Менска-Магілёўскім Тадэвушам Кандрусевічам. Аляксандр Лукашэнка агледзеў адрэстаўраваныя роспісы храма, якія аднаўляліся цягам некалькіх гадоў пры падтрымцы ўлад, паведамляе БелТА.

Падчас наведвання касцёла адбылася гутарка Аляксандра Лукашэнкі і Тадэвуша Кандрусевіча ў фармаце «адзін на адзін».

Лукашэнка і кіраўнік Менска-Магілёўскай архідыяцэзіі РКЦ абмяняліся падарункамі. Кіраўніку дзяржавы быў уручаны памятны медаль, у сваю чаргу Аляксандр Лукашэнка паднёс у дар архікафедральнаму касцёлу карціну «Касцёл у Жупранах» мастака Эдуарда Рымаровіча (на карціне адлюстраваны каталіцкі храм у гонар святых апосталаў Пятра і Паўла ў Ашмянскім раёне).

Рымска-каталіцкая канфесія з'яўляецца другой па велічыні ў Беларусі. Цяпер у краіне налічваецца 457 каталіцкіх парафій, аб'яднаных у чатыры дыяцэзіі.

Хартыя 97,
pahonia.org

Iнтэрнэт-выданне
pahonia.pomedia.by
працягвае традыцыi газет ПАГОНЯ i ДЕНЬ.


Спасылка на pahonia.promedia.by абавязковая.